ایئرکنڈیشنر جسے آپ پہن کر کہیں بھی جا سکتے ہیں

موسم گرما اپنے عروج پر ہے اور سورج کی  شعاعیں دماغ کو انڈے کی طرح فرائی کر رہی ہیں

اگرچہ اس گرمی کا حل ائیر کنڈیشنر کو سمجھا جاتا ہےلیکن اسے ہر کوئی خرید نہیں سکتا اور خرید بھی لے تو چلا نہیں سکتا ۔آہ بجلی کا بل ۔ لیکن اگر آپ کو آفر کی جائے ایک ایسے اے سی کی جسے آپ اپنی  شرٹ کی طرح پہن سکیں تو یقیناً آپ اسے خریدنا چاہیں گے 

سونی نے گزشتہ سال  ایک ایسا اے سی تیار کیا تھا جسے جیب  میں رکھا جاسکتا ہے اوراس پروٹوٹائپ ویئرایبل ایئرکنڈیشنر کو ایک خاص قسم کی ٹی شرٹ کے ذریعے  استعمال کیا جاسکتا ہے۔ 

ریون پاکٹ  نامی اس  اے سی کو  لباس کے اندر منسلک کیا جاتا ہے

یہ اے سی ایک خصوصی ٹی شرٹ کی گردن اور کمر کے درمیان موجود جیب میں رکھ دیا جاتا ہے اور یہ خاموش ڈیوائس گردن کے قریب اس جیب میں ٹھہر کر تھرمو الیکٹرک کولنگ خارج کرتی ہے۔

گرم موسم میں یہ اے سی آپ کے جسم کا  درجہ حرارت 13 ڈگری تک پہنچا دیتا ہے جبکہ سرد موسم میں یہ جسمانی درجہ حرارت کو 8 ڈگری تک بڑھا دیتا ہے ۔

یہ ڈیوائس حرارت کو جذب بھی  کر سکتی ہے اور  خارج بھی  یعنی یہ بیک وقت اے سی بھی ہے اور ہیٹر بھی جو آپ کو سردی اور گرمی دونوں سے محفوظ رکھ سکتا ہے۔ لیکن یہ اے سی ایک دفعہ چارچنگ کے بعد صرف دو گھنٹے ہی کام کرسکتا ہے۔ کمپنی کاکہنا ہے کہ گھر سے دفتر یا بازارجانے کے لئے یہ بہترین ہے۔

اس ڈیوائس کو  ایک اینڈرائیڈ  ایپ کے ذریعے  کنٹرول کیا جاسکتا ہے اور یو ایس بی کیبل سے آسانی سے چارج کیا جاسکتا ہے۔

اس ڈیوائس کو  ٹوکیو اولمپکس  2020  کے لیے تیار کیا گیا تھا اولمپکس گیمز کے التوا کی وجہ سے اسے فروخت کے لئے پیش کر دیا گیا ہے۔ 

اس اے سی کی قیمت 20000 پاکستانی روپے ہے جبکہ اسے پہننے کے لئے جو شرٹ استعمال ہوتی ہے وہ 2800 پاکستانی روپے کی ہے۔ 

لیکن ابھی تک یہ صرف جاپان میں ہی دستیاب ہے۔